𝗜𝗟𝗢𝗜𝗟𝗢 𝗖𝗜𝗧𝗬 —Ginpasuspendi sang Office of the Ombudsman si Punong Barangay Marites Nava sang Brgy. Libertad, Lapuz, Iloilo City bangud sa kaso nga ‘disgraceful and immoral conduct’.
Sa interview sang Bombo Radyo kay Mr. Oscar Lim, head sang Department of the Interior and Local Government (DILG) – Iloilo City, iya ginpahayag nga masuspende si Nava sa sulod sang anom ka bulan kag isa ka adlaw nga wala sang sweldo, santo sa nakasulat sa memorandum.
Suno kay Lim, nagpadulong sila sa nasambit nga barangay agud nga magserbe sang kasuguan, apang natumod nga wala si Nava sa ila puluy-an bangud yara ini sa Australia kag naka-on-leave sang duha ka bulan.
Ginpahayag man sini nga ginpa-recieve na lang nila sa una nga kagawad ang kopya sang sulat, samtang ang isa naman ka kopya ang personal nga ginbaton sang iya iloy.
Gin-athag man sang natungdan nga apisar wala ang nasambit nga punong barangay, epektibo sa gihapon ang gindagdag nga suspensyon batok sa iya.
Indi paman matumod sang Department of the Interior and Local Government kon maga-appeal si Nava sa kaso nga gindagdag sa iya.
