ILOILO CITY – Arestado ang punong barangay sang Lip-ac, San Enrique, Iloilo matapos nabaklan sang ginapatihan shabu sa Barangay Palje sang nasambit nga banwa.
Ang arestado amo si Punong Barangay Elvie Paez, 47.
Nabaklan si Paez sang isa ka sachet sang suspected shabu nga nagabalor sang P1,000.
Sang ginrikisa, nakuha dugang sa iya ang 11 ka mga sachets kag duha ka improvised short firearms.
Sa interview sang Bombo Radyo kay Police Captain Johnny Oro, hepe sang San Enrique Municipal Police Station, iya ginpahayag nga madamo sang nagareklamo sa lugar sang punong barangay nga nagabaligya kag nagagamit ini sang iligal nga droga nga gin-ako man mismo sang subject.
Suno kay Oro, padayon pa nga gina-imbestigaran kun sin-o ang dako nga supplier nga ginakuha-an ni Paez sang iligal nga droga.
Sa subong, preso na ini sa San Enrique Municipal Police Station kag natalana nga pasakaan sang kaso nga paglapas sa Republic Act 9165 ukon ang Comprehensive Dangerous Drugs Act of 2002.
