ILOILO CITY – Ginahangkat ni Punong Barangay Jayjay Mercado sang Navais, Mandurriao, Iloilo, City ang nagareklamo nga wala mahatagan sang food packs nga magpakilala.
Sa interview sang Bombo Radyo kay Mercado, iya ginpahayag nga dako ang nasakupan sang barangay sa diin may yara ini sang 11 ka mga zona.
Nakahatag na sang ika-tatlo nga ayuda ang barangay sa mga pumuluyo apang bangud limitado ang mga bugas kag delata, gin-una ni Mercado nga mahatagan ang mga indigents.
Apang suno sa punong barangay, sa ika-apat nga pagpanagtag sang bugas kag delata, tanan na nga pumuluyo sang barangay ang nakabaton bangud bastante na ang supply sang food packs.
Ginsiguro ni Mercado nga wala sang ginalaktudan nga balay sa tion nga sila ang manghatag sang pagkaon.
