𝗜𝗟𝗢𝗜𝗟𝗢 𝗖𝗜𝗧𝗬 — Nagsabat ang pila ka mga punong barangay sa piyak sang mga impormasyon nga natahap ang mga ini sa pagbuyagyag sang mga durugista sa ila lugar.
Sa interview sang Bombo Radyo kay Punong Barangay Judy ” Nonoy” Navales sang Brgy. Rizal Pala-pala II, Iloilo City, iya ginpahayag nga aminado siya nga may mga indibidwal sa gihapon sa ila nga lugar ang padayon nga gina-monitor bangud sa iligal nga druga.
Suno kay Navales, baliskad ang alegasyon sa ila bangud daw kaangay na sila sang pulis nga doble ang pagsekyar kag pag-monitor sa mga nagapasakop sa iligal nga aktibidad ilabi na sa mga bag-uhanon sa ila nga barangay.
Ginpahayag man sini nga kun nahadlok sila bilang kapitan, kuntani wala na lang sila nagpadalagan, sa diin, ginpaathag sini nga ang ila katungdanan ang tapna-on ang iligal nga druga sa ila nga komunidad.
Nagpanindugan man ini nga wala sila nagakatahap sa pagbantay agud gilayon nga madula ang iligal nga druga, indi lang sa ila lugar kundi sa tagsa ka mga kabarangayan sa syudad.
Nagpasalig man ini nga bukas ang ila talatapan sa kun sin-o man ang matuyo nga magsekyar tuhoy sa iligal nga druga.
