ILOILO – Madugay na nga may pamahog sa kabuhi nga nabaton si Julie Catamin, punong barangay sang Roosevelt, Tapaz, Capiz nga ginluthang-patay sa Malitbog Centro, Calinog, Iloilo.
Sa interview sang Bombo Radyo kay Pol. Lt. Col. Joem Malong, spokesperson sang Police Regional Office VI, iya ginpahayag nga ini ang santo sa impormasyon nga ginpalab-ot sang Calinog Municipal Police Station.
Indi pa matumod ni Malong kun ano nga klase sang pagpamahog ang nabaton ni Catamin, apang daku ang posibilidad suno kay Malong nga may kaangtanan ini sa suporta sang biktima sa community support program sang PNP kag Philippine Army.
Suno kay Malong, ginakonsiderar ang tanan nga rason kag anggulo sa nagapadayon nga imbestigasyon sang PNP.
Ginpahayag ni Malong nga ally sang gobyerno si Catamin — aktibo nga kaalyado batok sa rebelde nga grupo. Sang Setyembre 15, 2020, sa idalom sang pagpamuno ni Catamin, gindeklarar sang Barangay Roosevelt ang CPP-NPA bilang Persona Non Grata.
Suno pa kay Malong, indi man makumpirma sang mga pulis kun ano ka matuod ang nagagwa man nga impormasyon sa kun ano man ang koneksyon ni Catamin sa ginapahayag mga miyembro sang New People’s Army.
