Ginkadismaya ni Punong Barangay Ronela Juaneza sang Barangay San Isidro, Jaro, Iloilo City ang wala pagpahibalo sa iya nahanungod sa ginpatigayon nga distribusyon sang rice subsidy sa ila barangay sa idalom sang Bigay Bigas sa Masa Rice Program sang Iloilo City Government.
Sa interview sang Bombo Radyo kay PB Juaneza, iya ginpahayag nga natingala ini sang mahibaluan ang distribusyon sang bugas bangud sang amo nga tion sa Manila ini kag nagtambong sa Liga ng mga Barangay.
Suno sa iya, wala sang koordinasyon ukon pormal nga pagpahibalo sa iya antes ginpatigayon ang distribusyon.
Dugang pa sang punong barangay, nabasahan na lamang niya sa social media nga may ginpatigayon nga pagpanghatag sang bugas sa ila lugar kag kaangay nga may ara sang pinilian ang gintagtagan sini.
Suno kay Juaneza, madamo sang mga residente ang nagpalab-ot sang reklamo sa iya bangud may mga wala nakabaton sang bugas, samtang may iban naman nga suno sa ila nakabaton sang sobra pa.
Ginpahayag man sini nga wala ini nagapati nga ang validation kag assessment sang mga benepisyaryo ang ginpatigayon sang City Social Welfare and Development Office (CSWDO) bangud suno sa iya wala ini naimplementar sa insakto nga pamaagi.
Gindugang pa ni Juaneza nga dapat ang rice subsidy ang para sa ”30% poorest of the poor” sang barangay, kag antes pa man maaprubahan ang listahan sang mga benepisyaryo, dapat nakahibalo na ang CSWDO kon sin-o ang dapat makabaton sang bulig.
Suno sa punong barangay, importante ang husto nga koordinasyon sa barangay agud masiguro nga ang ayuda ang makaabot sa nagakaigo nga mga benepisyaryo kag malikawan ang mga reklamo sang mga pumuluyo.
