ILOILO CITY – Ginakasubo ni Punong Barangay Karl John Lapascua sang San Pedro, Molo, Iloilo City nga isirado na ang Molo PUV Terminal.
Sa interview sang Bombo Radyo kay Lapascua, iya ginpahayag nga madamo sang mga pumuluyo ang madulaan sang trabaho subong bangud sayluhon na ang terminal sa Mohon, Arevalo.
Gintinguhaan man niya nga hingyuon si Iloilo City Mayor Jerry Treñas nga kun mahimo indi anay pag-ipasirado apang wala gid sang tyansa.
Suno kay Lapascua, nahangpan man niya ang alkalde bangud nasaad na ini sa Executive Order 95 series of 2020.
Nahibaluan nga ang closure order ang nasanto sa rekomendasyon sang Land Transportation Franchising and Regulatory Board bangud may yara sang madamo nga violations kag wala nakapasar ang Molo PUV Terminal sa standards sang nasambit nga ahensya.
