ILOILO CITY – Nagahilibion nga ginpatpat ni Monica Blumentritt, City Proper Punong Barangay Keith “Dabing” Espinosa ang rason sa iya pagpadulong kahapon sa talatapan ni Police Regional Office 6 (PRO-6) director Chief Supt. John Bulalacao kahapon.
Apang wala sini maatubang ang regional director nga nagpadulong sa isla sang Boracay sa amo nga ti-on.
Sa exclusive interview sang Bombo Radyo, ginpahayag ni Espinosa nga antes nagpadulong sa PRO-6, nagpadulong pa siya sa Philippine Drug Enforcement Agency (PDEA) agud kuntani klaruhon ang iya status sa drug watchlist sang ahensiya.
Apang wala si PDEA regional director Wardly Getalla rason nga nagpadulong siya sa PRO-6.
Suno sa punong barangay, mangayo kuntani siya sang bulig kay Chief Supt. Bulalacao bangud sang iya nabaton nga mga pamahog sa kabuhi.
May nagapadala sa iya sang mensahe suno kay Punong Barangay Espinosa paagi sa social media nga nagasiling nga siya na ang masunod kay Punong Barangay Remia Prevendido Gregori nga ginpatay sang damlag lang sa Igcadlum, San Joaquin, Iloilo.
Gusto man kuntani niya suno kay Espinosa nga klaruhon ang iya pangalan sa atubang ni Chief Supt. Bulalacao.
Upod sang punong barangay nga nagpadulong sa PDEA kag PRO-6 ang iya ugangan kag ang iya abogado.
Nahibaluan nga isa si Espinosa sa mga ginapahayag nga narco-politician kag ginakabig nga high value target sa siyudad.
Asawa ang punong barangay sang ginakabig man drug personality nga si anay Barangay Kagawad Jesus Espinosa Jr. nga naangot sa ginapahayag drug lord nga si Melvin Odicta.
