Liwat nga gin-aresto sang Manila Police District ang drag artist nga si Pura Luka Vega bangud gihapon sa iya kontrobersyal nga performance sang “Ama Namin” sadtong Hulyo 2023.
Gindakop si Luka paagi sa gahom sang warrant of arrest nga ginpaguwa sang Quezon City court kun sa diin may three counts ini sang gina-alegar paglapas sa Article 201 sang Revised Penal Code kun sa diin nalakip ang “immoral doctrines, obscene publications and exhibitions, kag indecent shows.”
Suno kay “Drag Den Philippines” director Rod Singh, nag-ugat ini sa reklamo halin sa tatlo ka simbahan nga naangot sa Philippines for Jesus Movement (PJM).
Nagadangat sa P360,000 ang kinahanglanon nga pyansa agud nga makaguwa ang nasambit nga drag artist sa custodial facility sang Sta. Cruz Police Station.
Nahibaluan nga sang Pebrero 26, nag-pyansa man si Luka sa Pasay City bangud sa anum ka counts sang ginapahayag nga paglapas sa Article 201 “in relation to Section 6 of R.A. 10175” nga naangot naman sa reklamo sang Kapisanan ng Social Media Broadcasters ng Pilipinas.
Matandaan nga sang Oktubre 4, 2023, naaresto man si Luka bangud sa amo man nga reklamo kun sa diin nag-absent ini sa preliminary investigations sa amo nga kaso-kriminal sa Manila. Naka-guwa siya paagi sa pagpyansa sang P72,000 sa bulig man sang kaangay sini nga drag artists.
Ang ginakaugtan sang mga tagreklamo nga performance ni Luka amo ang iya nga video lip syncing sa “Ama Namin” remix samtang nga suksok sini ang panapton nga nagailog kay Hesukristo. Magluwas nga madamo ang nagpakamalaot sa amo nga performance, gindeklarar man ang amo nga drag queen nga persona non grata sa madamo nga syudad kag probinsya sa Pilipinas.#
