Pusil kag mga granada nga ginapahayag napanag-iyahan sang NPA, narekober sa Brgy. Igcabito-on, Miagao, Iloilo

𝗠𝗜𝗔𝗚𝗔𝗢, 𝗜𝗟𝗢𝗜𝗟𝗢 —Narekober sang mga katapo sang 601st Regional Mobile Force Battalion ang mga de-calibre nga mga pusil kag kagamitan nga ginapahayag nga ginapanag-iyahan sang mga myembro sang New People’s Army (NPA) sa Barangay Igcabito-on, Miagao.

Sa interview sang Bombo Radyo kay Police Captain Francis Donne Lomahan, hepe sang Miagao Municipal Police Station, iya ginpahayag nga nakit-an ang duha ka backpack nga nagaunod sang mga kagamitan, kaangay na lamang sang bandolier, apat ka magazines sang AK-47,16 ka bala sang AK-47, apat ka bala sang 5.56mm, tatlo ka magazines sang M16, walo ka short magazines sang M16, isa ka M203 grenade, kag iban pa nga kagamitan.

Ginpahayag man sini nga lakip man sa unod sang bag ang mga pagkaon kaangay sang bugas kag mga canned goods.

Ginatumod man sang mga otoridad nga ang mga pusil kag kagamitan amo ang ginapanag-iyahan sang squad 3 sang Regional Sentro de Gravidad (RSDG), Komiteng Rehiyon-Panay.

Nahibaluan nga ini nga grupo amo ang pinakaulihi nga naka-engkwentro sang mga tropa sang gobyerno sa amo nga banwa sang bulan sang Marso.

Ginsaysay naman sang natungdan nga nakahamtang ang mga bag sa isa lamang ka lugar kag posible nga ginbilin ini sang mga rebelde samtang sila ang nagapalagyo.