Ginkumpirma sang punong barangay sang Amparo, Pavia, Iloilo nga ang gin-gamit sang suspek nga pusil sa pagluthang-patay sa barangay tanod ang ginapanag-iyahan mismo sang biktima.
Ang biktima amo si Carmelino Minor, Jr., alyas Bobot, 52, residente sang nasambit nga barangay.
Samtang ang gin-aresto naman sang kapulisan amo si Regie Gaborno, 41, residente man sang amo nga lugar.
Sa interview sang Bombo Radyo kay Punong Barangay Andrew Almeria, iya ginpahayag nga sang naaresto ang suspek sa hot pursuit operation, narekober sa iya ang pusil sang biktima nga caliber .45 pistol.
Suno kay Almeria, wala man sang lisensya ang amo nga pusil nga masami ginadala sang biktima bilang pangdepensa sa kaugalingon.
Nahibaluan nga magluwas sa pusil, nadula man ang slingbag ni Minor nga ginapahayag nga nagaunod sang dako nga kantidad.
Wala naman sang ihibalo si Almeria kun ano gid ang rason kun nga napatay sang suspek ang biktima.
Sa subong, nakahunong na sa Pavia Municipal Police Station si Gaborno matapos nadakpan sa hot pursuit operation.
