ILOILO CITY- Ginahikutar na sang Department of Transportation (DOTR) Central Office ang request sang Land Transportation Franchising and Regulatory Board (LTFRB) nga i-lift ang suspension sang fuel subsidy distribution kasunod sang Ban on Disbursement sang Commission on Elections(COMELEC).
Sa interview sang Bombo Radyo kay Mr. Raymundo Boyet Parcon, presidente sang Iloilo City Loop Alliance of Jeepney Owners and Drivers Association (ICLAJODA),iya ginpahayag nga sa ila pagpakig-angot sa legal department sang LTFRB Region 6, ginpalab-ot sa ila nga ginahingagaw ang pag-request sini sa COMELEC kag nagalaum nga maaprubahan ini sa Biyernes, Abril 8.
Suno kay Parcon, kun maaprubahan, posible nga pagkatapos sang Semana Santa na ma-resume ang pagpanagtag sang fuel subsidy.
Nahibaluan nga kun matigayon, makabaton man sang assistance ang mga taxi drivers kag operators nga wala nalakip sa mga benepisyaryo sa una nga hugnat sang pagpanagtag sang fuel subsidy.
