Gin-ulan sang pagpakamalaot ang mamalidha nga nagarepresenta sang public utility drivers kag commuters bangud sa nangin enggrande sini nga kasal sa Balesin Island Resort sa Polilio, Quezon.
Si Claudine Bautista ang party list representative sang Drivers United for Mass Progress and Equal Rights-Philippines Taxi Driver Association.
Nangin sentro sang publiko ang nangin kasal ni Bautista matapos ginpakigbahin sang fashion designer nga si Michael Cinco ang gindisenyo niya nga gown.
Bangud sini, madamo nga mga netizens ang nagwangal sa social media sa diin ginpost ang mga campaign photo ni Bautista kag ginpakilala ini sa mga drivers kag commuters nga ang nasambit nga mamalidha amo ang isa sa mga nagboto sang “No” sa paghatag sang prangkisa sa isa ka TV network kag ginkasal sa isa ka luxury destination gamit ang malahalon nga gown ni Michael Cinco sa tunga sang pandemya.
May mga pictures pa nga naglapta nga nagapakita sang mga guests ni Bautista sa iya kasal kag ini amo sanday Davao City Mayor Sara Duterte, anay presidente Gloria Macapagal-Arroyo, negosyante nga si Ramon Ang, kag si Dept. of National Defense Secretary Delfin Lorenzana.
May mga nagdepensa man sa mamalidha kag ginpahayag nga ang pamilya sini kag sang iya bana ang may yara sang ikasarang nga magpatigayon sang amo nga event.
Samtang nasaad naman sa Republic Act No. 6713 nga ang government officials ang kinahanglan nga mabuhi sang simple nga nagakaigo lamang sa ila nga posisyon kag income.
