“𝘕𝘦𝘷𝘦𝘳 𝘨𝘪𝘷𝘦 𝘶𝘱 𝘰𝘯 𝘺𝘰𝘶𝘳 𝘥𝘳𝘦𝘢𝘮𝘴. 𝘕𝘦𝘷𝘦𝘳 𝘭𝘰𝘴𝘦 𝘩𝘰𝘱𝘦. 𝘕𝘰 𝘥𝘪𝘴𝘢𝘣𝘪𝘭𝘪𝘵𝘺 𝘯𝘰𝘳 𝘪𝘭𝘭𝘯𝘦𝘴𝘴 𝘯𝘰𝘳 𝘱𝘳𝘰𝘣𝘭𝘦𝘮 𝘤𝘢𝘯 𝘩𝘪𝘯𝘥𝘦𝘳 𝘢 𝘥𝘦𝘵𝘦𝘳𝘮𝘪𝘯𝘦𝘥 𝘱𝘦𝘳𝘴𝘰𝘯 𝘪𝘯 𝘩𝘪𝘴 𝘲𝘶𝘦𝘴𝘵 𝘧𝘰𝘳 𝘦𝘹𝘤𝘦𝘭𝘭𝘦𝘯𝘤𝘦.𝘊𝘭𝘪𝘯𝘨 𝘵𝘰 𝘵𝘩𝘦 𝘓𝘰𝘳𝘥 𝘣𝘦𝘤𝘢𝘶𝘴𝘦 𝘵𝘩𝘦 𝘓𝘰𝘳𝘥 𝘸𝘪𝘭𝘭 𝘨𝘪𝘷𝘦 𝘺𝘰𝘶 𝘵𝘩𝘦 𝘴𝘵𝘳𝘦𝘯𝘨𝘵𝘩 𝘸𝘩𝘦𝘯 𝘢𝘭𝘭 𝘰𝘧 𝘺𝘰𝘶𝘳𝘴 𝘴𝘵𝘳𝘦𝘯𝘨𝘵𝘩 𝘪𝘴 𝘨𝘰𝘯𝘦.”
Ini ang pinakagamhanan nga mga tinaga sang isa ka Person with Disability (PWD) nga sa pihak sang iya kondisyon, nagmadinalag-on sa iya nga handom.
Siya si Atty. John Marvin Marañon, ang Leganesnon nga isa sa mga nakapasar sa bag-o gid lamang ginpagwa nga resulta sang December 2024 Bar Examinations.
Si Marañon, kaangay sang iban man nga mga indibidwal nga luyag nga mangin abogado, ang may pinasahi kag ekstraordinaryo man nga istorya sang handom, pagtilaw, paglaum, kag pagmadinalag-on.
Antes siya nalakip sa 3,962 nga nakapasar gikan sa 10,490 nga examinees, siya ang isa sa madamo nga mga abogado subong nga indi lahog-lahog ang inagihan.
Sa programa nga Good Morning Philippines sa Bombo Radyo Iloilo, eksklusibo nga ginpakigbahin ni Marañon ang iya istorya.
HANDOM
Bata pa lamang si Marañon, masami na siya ginahambalan sang mga tawo sa iya palibot nga kun magdako siya, masunod gid ini sa tapak sang iya amay nga isa man ka abogado.
“Kinder pa lang ko, gintulod na sang mga ginikanan ko nga mangin abogado ako. Gin-instill nila sa mind ko nga ma-attorney ako,” suno kay Marañon.
Apisar nga nurse ang iya iloy, wala man ini gin-engganyo ang iya anak nga magkuha sang amo nga kurso bangud ang iya nga iloy mismo ang nagapati man nga bagay gid ang iya anak nga mangin mananabang.
Nag-eskwela si Marañon sang elementarya kag sekondarya sa Central Philippine University (CPU) kag nagtapos sang iya kolehiyo sa St. Vincent’s College Incorporated sa kurso nga Bachelor of Science in Accountancy.
Sang 2017, matapos nag-gradwar sa kolehiyo, nag-enrol siya sa law school sa CPU.
Suno kay Marañon, sang amo nga tion, wala na ini sang iban pa nga direksyon nga luyag usuyon kundi ang dalan padulong sa pagka-abogado.
PAG-ABOT SANG PAGTILAW
Sang tuig 2018, sa tunga sang wala nagapakunaw sini nga determinasyon kag dedikasyon sa iya pagtuon, isa ka wala ginalauman nga hitabo ang nagpaalimunaw sa iya naumpisahan nga handom.
Nakaangkon siya sang avascular necrosis nga posible resulta sang pagkabalda niya sadto sang natumba siya samtang nagahampang sang basketball.
Base sa Johns Hopkins Medicine, ang avascular necrosis amo ang balatian nga resulta sang temporaryo ukon permanente nga pagkadula sang blood supply sa tul-an. Kun ang blood supply mag-untat, nagakapatay ang bone tissue kag naga-collapse ini.
Suno kay John Marvin,bisan ang pagpungko ang indi niya masarangan gani naapektuhan ang iya pagtuon.
Naglab-ot ini nga nangin bedridden siya sa sulod sang isa ka tuig.
Ini ang nagbag-o sang iya direksyon sa kabuhi bangud napilitan siya nga mag-untat sa iya pag-eskwela kag gindumdom nga didto na lang kutob ang iya handom kag ang iya kabuhi.
“New Year sadto sang 2018, while nagaselebrar ang iban, ako ya nagasininggit sa kasakit. Bisan ang hangin, bisan ang slightest touch, nagasakit gid ang lawas ko,” pahayag ni John.
Sa sulod sang isa ka tuig nga bedridden ini, tuman nga kaluoy ang nabatyagan ni Marañon sa iya kaugalingon.
PAG-ATUBANG SA BALATIAN
Samtang ginaantos ang iya balatian, nangin kahigayunan man ini para kay Marañon nga mas labi pa nga maapresyar niya ang iya pamilya.
“Ang mother ko gid ang number one nga grabe gid ang iya sacrifices sa akon. Ang father ko ara man.Didto kami gatulog isa lang kami ka kwarto,” pahayag niya.
Suno sa iya, nagbakod pa gid ang relasyon sang iya pamilya kag mangin sang ila kaparyentehan nga nagabulig sa iya.
Pahayag ni John, kaangay nga nagbalik ini sa iya pagkabata nga ginapaliguan siya sang iya iloy, ginapailisan, ginapakaon, kag ginapainom sang bulong.
Suno pa sa iya, nagamit gid sang iya iloy ang iya propesyon bilang nurse, indi sa iban nga tawo, kundi sa kaugalingon nga anak.
Ang pag-unong sang iya pamilya sa tunga sang iya kabudlay ang naghatag sang paglaum kay John nga buligan ang iya kaugalingon nga makarekober.
Isa man sa pinakamaayo nga butang nga dulot sang amo nga pagtilaw sa iya kabuhi amo nga mas napalapit ang iya relasyon sa Diyos.
“Ang Ginuo lang gid ginakaptan mo, nga daw wala-wala ka na gid bala.Dara ka na gid lang makapit sa iya eh.Ginpa-experience niya sa akon nga sa Iya lang gid ko makapangayo bulig,” pahayag niya.
PAGPADAYON KAG NABUHI NGA PAGLAUM
Tuig 2020 sang naglupok ang pandemya bangud sa COVID-19 outbreak, apisar nga madulom nga bahin ini sang kabuhi sang mga tawo sa bilog nga kalibutan, naghatag naman ini sang kasanag kay John nga magbalik sa pag-eskwela.
Suno sa iya, sang ginpatuman ang online classes, gin-engganyo ini sang mga tawo nga padayunon ang iya pagkuha sang law.
Diri nahatagan siya sang ikaduha nga kahigayunan para sa iya handom gani samtang yara lang ini sa iya hiligdaan, balik- estudyante ini paagi sa pag-attend sa virtual class.
Sang 2022, sa amat-amat nga pagbalik sang tanan sa normal, nagatambong ini sa limited in-person classes samtang may ginauyatan nga walker agud suportahan ang iya paglakat sa sulod sang eskwelahan.
Gin-ako niya nga tuman ka budlay ang iya sitwasyon sang amo nga tion.
“I need to accept the fact gid sa mind ko that I can never be the usual law student,” suno kay Marañon.
Apang natigayon nga matapos ni John ang pag-eskwela sa law school.
KATUMANAN SANG HANDOM
Nagkuha sang bar exam si Marañon sang Septyembre 8, 11 kag 15 kag indi manegar nga nangin pagpanghangkat man ini sa iya bangud sa iya kondisyon.
Sa pagkamatuod, ginpaiway anay niya ang natalana kuntani nga hip replacement surgery para lang madayon ang pagkuha niya sang pasinawan.
Samtang nagakuha sang exam, mangin siya ang wala man naglaum nga makapasar siya.
Sang gin-release na ang resulta sang Disyembre kag nakit-an ang iya pangalan sa mga passers, indi matungkad ang nabatyagan nga kalipay ni John.
“May miracle gid para sa akon nga gin-allow ako sang Ginuo nga makapasar. Praise God for that,” ang mapinasalamaton nga pahayag niya.
REALISASYON
Subong nga isa na ka abogado si Marañon, luyag sini anay nga makompleto ang iya recovery sa iya kondisyon.
Suno sa iya, gamiton man niya ang iya propesyon subong agud maghatag sang inspirasyon sa iban nga bisan may kasablagan sa lawas, indi ini dapat mangin upang agud magtinguha kag mahatagan sang katumanan ang mga butang nga luyag lab-uton.
“Never give up on your dreams. Never lose hope because no disability can put you down or can hinder a determined person to quest for excellence,” panugyan niya sa iban nga PWDs nga may handom.
“Cling to the Lord because the Lord will give you the strength when all of your strength is gone,” dugang sini sa interview sa Good Morning Philippines sa Bombo Radyo Iloilo.
