Pabaskugon pa sang North Atlantic Treaty Organization (NATO) ang depensa sini sa Europa sa tunga sang padayon nga pagpang-atake sang Russia sa Ukraine.
Suno kay NATO Secretary General Jens Stoltenberg, may ipadala nga dugang nga pwersa paagi sa apat ka bag-o nga battle groups sa Bulgaria, Hungary, Romania kag Slovakia.
Naistoryahan ini sa pagsinapol sang NATO, European Union kag G7 countries sa Belgium.
Magapadala man ang NATO sang dugang nga anti-tank systems, drones, naval power, kag jets sa mga lugar sa palibot sang Ukraine.
May ihatag man ang NATO nga dugang nga cyber security assistance kag equipment agud buligan ang Ukraine nga maproteheran ang pungsod batok sa biological, chemical, biological kag nuclear nga mga pagpamahog.
Lakip man sa namensyonar nga bulig amo ang detection, protection kag medical supplies, amo man ang training para sa komunidad, contamination, kag crisis management.
Samtang, nagpaandam naman si US President Joe Biden nga magabalos ang Estados Unidos kun maggamit si Russian President Vladimir Putin sang chemical weapons.
Ang sabat sang US suno kay Biden ang depende man kun ano nga klase sang paggamit ang himuon sang Russia.
Sa iya nga press conference, ginpahayag man ni Biden nga nagapati si Putin nga mabuka ang NATO, apang baliskad ang nagakatabo suno kay Biden bangud nagabaskog pa gid gani ang ila nga alyansa.
