ILOILO CITY- Kulang katama ang personnel sang Philippine National Police sa Syudad sang Iloilo.
Sa interview sang Bombo Radyo kay Pol. Capt. Shella Mae Sangrines, tagpamaba sang Iloilo City Police Office, iya ginpahayag nga may yara lang sang 635 ka mga police sa bilog nga Iloilo City Police Office para magbantay sa populasyon sang bug-os nga syudad nga nagalab-ot sa 475, 384.
Suno kay Sangrines, nagakahulugan ini nga sa kada isa ka pulis, may yara sang 748 ka pumuluyo nga dapat bantayan.
Ginpahayag ni Sangrines nga tuman kalayo ini sa ideal ratio nga isa ka pulis sa kada 500 ka pumuluyo.
Samtang, sa kabilugan nga mga distrito sa syudad, ang Police Station 1 sa Iloilo City Proper ang may yara sang pinakamadamo nga police force nga nagalab-ot sa 85 para sa 61,961 ka pumuluyo ukon may ratio nga isa ka pulis sa 728 ka tawo.
Ang Iloilo City Proper suno kay Sangrines ang mas nagakinahanglan sang mas madamo nga pulis bangud diri makit-an ang dalagko nga mga establishments, mga bangko kag mga opisina sang gobyerno.
