Nagpakigkita ang Qatar sa presidente sang International Criminal Court (ICC) agud diskusyunan ang mahimo i-kaso sa Israel bangud sa airstrike sini sa mga lider sang Hamas sa ila teritoryo sang nagligad nga semana.
Mismo ang top negotiator sang Qatar nga si Mohammed al-Khulaifi ang nagkadto sa The Hague sang Miyerkules kaupod si Judge Tomoko Akane, ang presidente sang ICC, samtang ginahimo sang Doha ang tanan nga posible nga legal kag diplomatiko nga paagi agud mapasabat ang mga may sala.
Sa amo nga atake, nakaluwas ang top officials sang political bureau sang Hamas apang lima sa ila nga mga myembro ang napatay amo man ang isa ka officer sang internal security force sang Qatar.
Nahibaluan nga sang nagligad nga tuig, nagdagdag na ang ICC sang arrest warrant batok kay Israeli Prime Minister Benjamin Netanyahu kag former defense minister Yoav Gallant bangud sa ginaalegar nga war crimes kag crimes against humanity kasunod sang gyera sa Gaza. Lakip sa gintumod nga krimen amo ang pag-target sa mga sibilyan nga Palestinians kag paggamit sang gutom sa amo nga gyera.
Nagpaguwa man anay ang korte sang arrest warrants sa pila ka mga Hamas leader nga ginpatay naman sang Israel.
