Ginlutos sang Ecuador ang host nation nga Qatar, 2-0, sa opening match sang 2022 FIFA World Cup sa Al Bayt Stadium.
Ang duha ka goal sang Ecuador ang lunsay nagikan sa 33-anyos nga team captain nga si Enner Valencia nga amo ang all-time top scorer sang pungsod.
Natigayon ini nga duha ka goals sa first half sang hampang: una, paagi sa penalty kick sa ika-15 nga minuto bangud sa foul sang Qatar keeper nga si Saad Al Sheeb kag ang ikaduha naman amo ang 31st-minute header nga naghatag sang lead sa Ecuador.
Antes sini, may yara na kuntani sang goal halin kay Valencia sa ikatatlo nga minuto pa lang sang hampang apang gin-disallow kasunod sang ‘Video Assistant Referee’ review bangud sa marginal offside.
Ang pagdaog sang Ecuador sa first match sa 2022 World Cup amo ang labing-una nga tion sa World Cup history kun sa diin ang opening goal sa single edition sang tournament ang na-score pinaagi sa penalty spot.
Kun halimbawa wala gin-disallow ang una nga goal ni Valencia sa ika-tres minutos sang hampang, ini kuntani ang kabigon nga pinakadasig nga World Cup goal sa opening match.
Kasunod sang duha ka goals ni Valencia, siya na ang all-time leading scorer sang pungsod Ecuador nga may 37 ka goals sa 75 ka national team appearances.
Siya man ang highest-scoring player sang Ecuador sa World Cup history nga may apat na ka nahimo nga goals nga naglapaw sa tatlo nga rekord ni Agustin Delgado nga forward anay sang team kag amo man anay ang all-time top scorer sang pungsod.
Ang daog sang Ecuador nagakahulugan man nga nahigkuan ang pangalan sang Qatar bangud ini ang labing-una nga host nation sa World Cup nga nalutos sa mismo opener.
Nahibaluan nga sa FIFA rankings, yara ang Ecuador sa ika-44 nga pwesto samtang ang host naman nga Qatar ang yara sa ika-50 nga spot.
Sunod nga atubangon sang Ecuador ang Netherlands samtang atubangon naman sang Qatar ang Senegal sa ikaduha nga group stage match. ##
