Nagpaguwa sang public apology ang Quezon City Police District (QCPD) sa pamilya sang singer-songwriter nga si Janno Gibbs matapos nasapubliko ang video sang lawas sang amay sini — ang beterano nga film kag television actor nga si Ronaldo Valdez — nga napatay sang Disyembre 2023.
Sa statement sang police district, ginlaragway sini nga indi husto ang ginhimo sang pulis nga pagkuha sang video sa lawas sang biktima.
Ginpahayag pa sang pamunuan nga nahibaluan nila kun ano kabug-at ang sala nga nahimo sang personnel kag ila gid nga ginahinulsulan ang natuga sini nga sirkumstansya.
“The QCPD extends its sincere apologies to the Gibbs family regarding the recent incident where a member of our police force inappropriately took a video of the late Mr. Ronaldo Valdez. We acknowledge the gravity of this lapse in judgment of some of our personnel, and we deeply regret any distress this may have caused,” kabahin sang statement.
Ginpasalig man nga may madasig nga tikang nga himuon lakip na ang kaso-administratibo batok sa mga personnel nga involved sa insidente.
Disyembre 17 sang nasapwan nga patay ang 76-anyos nga aktor sa sulod sang iya hulot sa ila puluy-an kag ginapahayag nga may pusil pa sa kamot sini.
Suno sa QCPD, lima ka mga pulis nga naangot sa kaso ang magapangatubang sang kaso-administratibo lakip na ang neglect of duty; grave irregularity sa performance of duty; grave misconduct nga kaangot sa Republic Act 10173 (Data Privacy Act of 2012 kag RA 10175 (Cybercrime Prevention Act of 2012); conduct of unbecoming of a police officer kag grave misconduct nga kaangot naman sa Presidential Decree 1829 (Obstruction of Justice) kun sa diin dismissal from service ang maximum penalty.
Ang reklamo nga neglect of duty amo ang gin-file batok sa tatlo ka police officer sa idalom sang doctrine of command responsibility, samtang criminal complaints naman bangud sa paglapas sa Data Privacy Act and Cybercrime Prevention Act ang igapasaka sa mga sibilyan nga amo ang gina-alegar nag-leak man sang video.
“We were able to identify more or less apat na sibilyan na sila ang unang nag-upload sa social media nung video. Mayroon na tayong identification. We are ready to file the criminal case. We are just waiting for the family of Gibbs to file a complaint,” pahayag ni QCPD Director Police Brigadier General Redrico Maranan.
Popular si Valdez sa Philippine show business bangud sa halos anum ka dekada nga karera sini sa acting kag katapusan nga nakit-an sa romantic drama series nga “2 Good 2 Be True” nga ginbidahan sang former couple nga sanday Daniel Padilla kag Kathryn Bernardo.
Popular man siya sa iya papel sa mga pelikula nga “May Minamahal”, “The Mistress”, “Seven Sundays”, “Cedie”, “The Flor Contemplacion Story”, kag series kaangay sang Mula Sa Puso, FPJ’s Ang Probinsyano, kag I Love Betty La Fea.#
