SINGAPORE – Kinahanglan ang QR Code sa tion nga magsulod sa mga establisimento sa Singapore subong nga yara na sa phase 1 ang pagbukas sang pungsod.
Sa report ni Bombo International Correspondent Roberto Catipunan direkta sa Singapore, iya ginpahayag nga ang QR Code ang kinahanglan nga i-comply sa gobyerno para sa pag track sa detalye sang tawo nga naga-sulod sa mga establisimento.
Ang QR Code ang isa ka application sa cellphone nga gina-scan sa tion nga magsulod sa mga mall kag restaurant.
Kun transportasyon naman ang pagahambalan, padayon ang byahe apang gindula ang social distancing ukon ang one-seat-apart sa train kag bus agud malikawan ang pagpugok sang trapiko tuga sang mga commuters nga nagahulat sa dalan.
Suno kay Catipunan, sang nakaligad nga semana nagbukas na ang klase sa Singapore apang may mga kaso nga nagpositibo sa Coronavirus Disease 2019 (COVID-19) sa eskwelahan.
Bangud sini, nagpanawagan ang gobyerno sang pungsod nga antes pa man magsulod ang mga estudyante sa eskwelahan, nagakadapat nga ginpa-idalom ini sa COVID-19 test.
