Nawad-an sang pasensya ang mga mamalidha sa Kamara rason nga gindagdagan man sang contempt order si dismissed Bamban, Tarlac mayor Alice Guo bangud sa pagbinutig sini sa hearing sang quad committee ukon quad comm, Septyembre 19.
Si Abang Lingkod party-list Representative Joseph Stephen Paduano ang nag-move nga i-cite in contempt si Guo bangud sa sulit-sulit sini nga pag-invoke sang iya kinamatarong batok sa self-incrimination.
“You’re fooling this country, and you’re fooling the Filipino people… I move to cite Alice Guo in contempt,” suno kay Paduano.
Gin-move man sini nga i-detain si Guo sa idalom sang hurisdiksyon sang Kamara tubtub nga ma-adoptar ang committee report sa plenaryo.
Una na ginsiling ni Paduano nga daw naga-enjoy ini sa pagtinir sa Philippine National Police (PNP) Custodial Center, gani gin-suggest nga isaylo ang anay mayor sa Correctional Institute for Women.
Ginpasugtan man sang committee nga dal-on ini balik sa Camp Crame kagab-i, apang ginalauman nga isaylo siya sa Kamara kasunod sang arraignment sa Valenzuela subong nga aga.
“We will write the RTC branch 282 in Valenzuela city that after the said hearing, the authority to take custody, the person of Ms. Guo be transferred from the Philippine National Police to the House of Representatives,” dugang ni Paduano.
Matandaan nga ginpaidalom si Guo sa PNP Custodial Center sa Camp Crame, Quezon City bangud ginpili sini nga indi mag-pyansa sa iya kaso nga graft sa korte sa Tarlac.
Duha ka beses man ini nga na-contempt sa hearings sang Senate Committee on Women, Children, Family Relations and Gender Equality bangud man sa pagbinutig sa atubang sang mga senador.
Ang QuadCom— House committees on dangerous drugs, public order and safety, human rights, kag public accounts—amo ang naga-conduct sang mga imbestigasyon sa extrajudicial killings, illegal drugs, kag ginaalegar nga criminal activities sang Philippine Offshore Gaming Operators (POGOs) kun sa diin naangot si Guo.
