Gin-rekomendar sang House Quad Committee ukon QuadComm ang pag-file sang kaso batok kay former President Rodrigo Duterte kag mga kaalyado sini nga sanday Senator Bato dela Rosa kag Senator Bong Go kag iban pa nga mga indibidwal bangud sa mga ginaalegar nga pagpamatay nga naangot sa war on drugs sang anay administrasyon.
Sa presentasyon sang progress report sang mega-panel, ginpahayag sang lead chairperson nga si Surigao del Norte Rep. Ace Barbers nga sanday Duterte, dela Rosa, kag Go ang naglapas sa Republic 9851 ukon sa Philippine Act on Crimes Against International Humanitarian Law, Genocide and Other Crimes Against Humanity.
Nakit-an man sang quad comm nga may salabton ang anay mga pinuno sang Philippine National Police (PNP) nga sanday Oscar Albayalde kag Debold Sinas, retired Police Colonels Royina Garma kag Edilberto Leonardo, kag amo man si former Palace Assistant Irmina “Muking” Espino.
Suno kay Barbers, ang ila imbestigasyon sa quad comm ang nagpakita sa natabo nga abuso sa gahum kag institutional impunity sa idalom sang termino ni Duterte.
Ginpahayag sini nga ang mga testimoniya sang mga testigo ang plastado kaupod sa mga ebidensya ang nagpakita lamang sa ginbayaran nga pagpatay sa suspected drug personalities nga ginpahayag gin-ilog sa sistema sa Davao kag ginpatuman sa bilog nga pungsod sang nagpungko si Duterte.
Nakit-an man sang House Quad Committee nga criminally liable ang masunod nga mga personalidad bangud sa kaangtanan sa illegal drug trade kag sa pagpamatay nga naangot sa drug war:
- Willie Ong, Aedy Ty Yang kag former Mexico, Pampanga mayor Teddy Tumang kag incorporators sang Empire 999 kasunod sang pagka-kumpiskar sang 360 kilograms sang shabu sa Mexico, Pampanga nga isa ka paglapas sa Comprehensive Comprehensive Dangerous Drugs Act
- former President Duterte, Royina Garma, Edilberto Leonardo, Senior Police Officer 4 Arthur Narsolis, kag Superintendent Gerardo Padilla kasunod sang pagpatay sa Chinese nationals nga sanday Chu Kin Tung, Li Lan Yan, kag Wong Meng Pin sa Davao Prison and Penal Farm sang August 13, 2016
- Royina Garma, Edilberto Leonardo, kag Police Lieutenant Colonel Santie Mendoza, former PNP officer Nelson Mariano, kag certain Jeremy “Toks” Causapin, kag isa ka alias “Loloy” kasunod naman sa pagpatay kay Philippine Charity Sweepstakes Office (PCSO) kag retired Police General Wesley Barayuga nga nakapungko man anay bilang director sang Iloilo City Police Office
Matapos ang apat ka bulan nga hearings, ginpahayag ni Barbers nga natungdan nila ang ila mandato sa pagpatigayon sang inquiry paagi sa pag-file sang masunod nga mga hagna:
- House Bill No. 10986 nga naga-classify kag nagadagdag sang penalidad sa extrajudicial killings bilang heinous crime
- House Bill No. 10987 nga nagadumili sang tanan nga porma sang offshore gaming operations sa pungsod kag magahatag sang severe penalties para sa violations
- House Bill No. 11043 nga nagapahanugot sa civil forfeiture sang real estate properties nga iligal nga maangkon sang foreign nationals
- House Bill No. 11117 nga nagaplastar sang administrative cancellation sang birth certificates nga iligal nga maangkon sang foreign nationals
Ini nga progress report sang kasunod sang 13 ka hearings nga ginpatigayon halin sang Agusto 16 tubtub sang Disyembre 12. Naka-sentro ini sa extrajudicial killings, illegal drugs kag illegal Philippine offshore gaming operators.
“The investigation brought to light a harrowing narrative of abuse of power and institutional impunity during the Duterte administration. Witness testimonies corroborated by evidence revealed a system that incentivized the killing of suspected drug personalities: a system modeled after the so-called Davao template and replicated nationwide,” suno kay Barbers.
“This is not merely a report of the past wrongdoings, but a call to action,” dugang sini.
Wala sang gin-rekomendar ang QuadComm nga maga-file sang kaso criminal sa mga indibidwal nga gina-alegar involved sa drug smuggling kag sa krimen nga naangot sa POGO apang nagpahayag ini nga dapat may mas madalom nga mga imbestigasyon nga himuin batok sa pila ka mga persona.
Lakip sa ginapa-imbestigaran amo si Davao City Rep. Paolo Duterte nga bata ni former President Rodrigo Duterte bangud sa ginaalegar nga drug smuggling. Yara man ang pangalan ni former presidential spokesperson Harry Roque, Jr. bangud naman sa ginaalegar nga kaangtanan sa iligal nga POGO.
