Ginpangbawi na sang House Quad Committee ang gindagdag sini nga contempt orders batok kanday Alice Guo ukon Guo Hua Ping, Cassandra Li Ong, Tony Yang, kag Police Major Leo Laraga.
Antes ginsuspinde sang quad comm ang ila nga imbestigasyon sa illegal POGO activities kag war on drugs kagab-i, Disyembre 12, gin-aprubahan anay ang tanan nga motions para sa pag-lift sang contempt orders, ginsegundahan, kag wala sang miyembro nga nag-object.
Ginbawi na ang order kay Guo ukon ang dismissed mayor sang Bamban, Tarlac bangud suno kay Abang Lingkod party-list Rep. Stephen Paduano, napreso naman ini bangud sa iya kaso-kriminal partikular ang qualified human trafficking, graft, money laundering, material misrepresentation, kag iban pa.
Si Paduano man ang nag-move nga bawion ang pag-contempt kanday Ong, Yang, kag Laraga.
Gin-rason ang medical condition ni Ong nga yara subong naka-detain sa Correctional Institution for Women. Ginkumpirma man sang mga attending physician kag sang House of Representatives nga indi na sini masarangan ang pag-atubang sa congressional hearings.
Si Ong, kun madumduman, amo ang documented representative sang POGO firm nga Lucky South 99. Gin-cite in contempt siya sang Agusto kag sang Septyembre bangud sa pagpamalibad nga magsabat sa mga pamangkot sa hearings.
Ang Chinese national naman nga si Yang ang nagamasakit man kag naka-confine sa ospital sa Taguig kag may yara sang doctor’s certificate. Matandaan nga gin-detain siya sang Presidential Anti-Organized Crime Commission (PAOCC) sang Septyembre bangud sa ginaalegar nga pagbutig sa hearing. Utod siya ni Michael Yang nga anay economic adviser ni anay Presidente Rodrigo Duterte.
Sa pihak nga bahin, gin-lift ang contempt order kay Laraga sa ngalan sang “esperitu sang Paskuwa.” Gin-abisuhan ini nga mag-konsulta sa iya mga abogado kaangot sa motion for certiorari nga iya gin-file sa Korte Suprema.
Kun matandaan naman, gin-contempt siya sang Oktubre bangud gin-alegar nga wala ini naghatag sang husto nga mga sabat kaangot sa pagserbe sang search warrant batok kay anay Albuera, Leyte Mayor Rolando Espinosa.
Isa siya sa mga pulis nga nagserbe sang arrest warrant batok sa former mayor nga nagresulta sa pagtiniruhay tubtub nga napatay sa iya kamatayon samtang naka-detain bangud sa drug-related charges sang 2016.
