Gintumba sang former three-division world champion nga si John Riel “Quadro Alas” Casimero ang kasumpong sini nga Americano nga si Saul Sanchez sa imbukada pa lamang nga round sang super bantamweight bout sa Yokohama Budokan sa Yokohama, Japan.
10 ka rounds ang amo nga sambuwa apang sa umpisa pa lang sang ila pag-atubangay, maathag na sa hulag sang Pinoy boxer nga wala ini sang gana nga palawigon ang hampang.
Nag-igu ang right hook ni Casimero kay Sanchez rason nga nagpanukod na ini sa canvas kag gin-isipan na sang referee 30 segundos pa lang sa first round.
Nakalampuwas pa ang 25-anyos nga Amerikano kag nagbuya sang mga sumbag, apang napasulod sang Pinoy ang solid left hook nga nagtumba liwat kay Sanchez.
Nagbangon liwat ang kasumpong apang asud-asud na ang atake ni Casimero rason nga gin-untat na sang referee ang sambuwa kag gindeklarar nga daog ang Pinoy via technical knockout sa marka nga 2-minutes kag 41-seconds.
Nagsaka na subong sa 34-4-1 ang record sang 35-anyos nga si Quadro Alas nga may 23 knockouts, samtang nagnubo naman si Sanchez sa 21-4 record nga may 12 knockouts.
Antes nadayon ang hampang, may drama pa nga natabo sa weigh-in sang Oktubre 12 bangud nagbug-at si Casimero sang 56.3 kilos nga mas sobra sang isa ka kilo sa limit.
Sa ikaduha nga attempt duha ka oras ang nagligad, overweight man gihapon ini sa 55.9 kilos.
Base sa Japan Boxing Commission rules nga naugyunan man sang duha ka kampo, ginhatagan liwat sang tyansa si Casimero sa isa pa ka weigh-in sang aga sang adlaw na mismo sang hampang, kun sa diin na-clear na gid man sini ang bug-at nga 128 pounds rason nga nagpadayon ang non-title bout.
Indi ini ang una nga bes nga may mga problema si Quadro Alas sa iya bug-at.
May isyu man ini sa bug-at sa scheduled fight sini sang 2021 batok kay Paul Butler para sa iya anay WBO bantamweight world title.
Na-postpone ang original bout bangud nag-withdraw si Casimero sa weigh-in bangud sa iya ginpahayag nga gastritis.
Sang ulihi, dalayon na nga nakakasan ang WBO world title ang Pinoy fighter bangud sa paggamit sini sang sauna agud nga makasulod sa ginkasugtan nga bug-at sang gin-reschedule ang iya away batok kay Butler.
Nahibaluan nga ang paggamit sang sauna ang ginadumilian gid sa idalom sang medical guidelines sang British Boxing Board of Control.#
