Matapos ang isa ka tuig nga pahuway, magabalik na sa ring subong nga adlaw ang 35-anyos nga Pinoy boxer nga si Johnriel Casimero ukon si Quadro Alas.
Makasambuwa sini sa non-title super bantamweight bout ang American boxer nga si Saul Sanchez sa Yokohama Budokan sa Japan.
Ang ila away amo ang main event sa three-fight card kun sa diin yara man sa undercard ang isa pa ka Pinoy boxer nga si Vince Paras batok sa Japanese nga si Hiroto Kyoguchi. Ang nagakumpleto sa card amo ang sambuwa sang Japanese nga si Yukinori Oguni kag Namibian nga si Fillipus Nghitumbwa.
Katapusan nga nakit-an sa boxing ring si Casimero sang October 2023 sang nangin draw ang resulta sang hampang sini batok kay Oguni nga sang amo nga tion napilasan na sa fourth round kag ginpauntat na sang referee ang sambuwa.
Antes ang amo nga draw, si Casimero nga anay three-division world champion, ang may yara sang sunod-sunod nga kadalag-an sa walo ka away nga ang katapusan amo ang unanimous decision win batok kay Nghitumbwa.
Ang target ni Quadro Alas sa pagbalik amo ang makasaka sa super bantamweight division (122 lbs.) kun sa diin yara nakatungtong ang Japanese superstar nga si Naoya Inoue bilang unified champion.
Matandaan nga ginkakasan anay si Casimero sang World Boxing Organization (WBO) bantamweight title sang Mayo 2022 bangud duha ka beses niya ini nga wala nadepensahan bangud sa problema sa weigh-in.
Pang-pito siya sa rankings sa World Boxing Council (WBC) super bantamweight, pang-13 sa International Boxing Federation (IBF), kag pang-anum naman sa WBO.
Gina-uyatan sini ang 33-4-1 win-loss-draw card.
Ang 27-anyos naman nga kasumpong sini nga si “The Beast” ang may yara sang 21-3 win-loss record.
