Posible nga madayon na liwat ang napurnada nga away sa tunga nanday Nonito ‘Filipino Flash’ Donaire Jr. kag John Riel “Quadro Alas” Casimero.
Ini matapos gintuldukan na sang duha ang serye sang ila trash talk online paagi sa pagpangayo ni Casimero sang pasaylo kay Donaire.
Nag-sorry si Casimero pati sa asawa kag manager ni Donaire nga nadala man sa away online nga amo ang nangin rason kun ngaa nasuspinde ang ila nga sambuwa sang nagligad nga bulan.
“Sinabi ko sa asawa mo na pasensya na kung ang mga kasama ko na may nagawang mali. Tuldukan na natin yun, pasensya na sa asawa mo para matuloy na ang laban natin,” pahayag ni Casimero.
Ginbaton naman ni Donaire ang pahayag ni Casimero. “Ok na ako roon. Kung may trash talk naman, sabihin mo sa (akin) huwag mong isali naman ang asawa o pamilya ko. Hindi sila pupunta sa ring, ako, ikaw ang mag-away sa ring,” sabat ni Donaire.
Matandaan nga i-unify kuntani sang duha ang ila nga titulo sang bulan sang Agusto apang nag-withdraw si Donaire bangud ginapahayag wala ginarespeto ni Casimero ang iya nga pamilya kag asawa.
Si Donaire ang nagauyat subong sang WBC bantamweight title, samtang si Casimero naman ang reigning WBO champion.
May isa pa ka isyu nga kinahanglan athagon antes madayon ang away bangud nagmandu ang WBC kay Donaire nga depensahan ang iya nga titulo batok sa mandatory challenger nga si Reymart Gaballo.
