ILOILO CITY– Magapadayun santo sa mando sang Police Regional Office 6 Director ang mga quarantine control points, sa syudad kag probinsya sang Iloilo.
Sa interview sang Bombo Radyo kay Police Lt. Col Gilbert Gorero, acting spokesperson sang Police Regional Office 6, iya ginpahayag nga mismo si Police Regional Office 6 Director Police Brigadier General Rene Pamuspusan ang nagmando, nga apisar yara na sa modified General Community Quarantine ang bug-os nga Panay, sa gihapon magapabilin ang mga quarantine control points.
Suno kay Gorero, ang apisar naka MGCQ na, kinahanglan sa gihapon ang paghalong sang tagsa sa pumuluyo, bangud yara man sa gihapon ang pamahog sang coronavirus disease 2019
Pahayag pa ni Gorero strikto man nila nga ipatuman ang mga polisa sa modified GCQ, santo sa mga executive orders nga ginpapanaog sang mga local chief executives.
Samtang, sa bahin naman sang krimen suno kay Gorero, halos 60% ang gin-nubo sang krimen, bangud kalabanan sa mga pumuluyo ang yara sa ila tagsa ka panimalay.
Nagapangabay naman ang natungdan sa mga pumuluyo, nga kuntani magpabilin sa balay kun indi manlang kinahanglanon nga magwa, kag padayun nga sundon ang physical distancing kag paggamit sang facemask.
