ILOILO CITY – Pagadugangan sang Iloilo City Government ang quarantine facility para sa mga nagabusong nga iloy nga COVID-19 positive.
Ini matapos nga gindeklarar ni Mayor Jerry Treñas nga ang La Paz Maternity Clinic amo ang magaserbe nga quarantine facility para sa mga nagabusong nga nagpositibo sa virus.
Sa interview sang Bombo Radyo kay Public Safety and Transportation Management Office Head Jeck Conlu, iya ginpahayag nga ginahimus na ang sulod sang La Paz Maternity Clinic agud nga maplastar na ang hospital beds kag iban pa nga equipment.
Magluwas diri, ang Calumpang Lying-in Center ang magaserbe man nga quarantine facility apang bangud nga tuman ka gamay ang space, nagapangita pa ang Iloilo City Government sang dugang nga Lying-in clinic nga mahimo gamiton.
Suno kay Conlu, ang mga iloy nga nagakinahanglan sang cesarean amo ang pagadal-on sa hospital.
Mas makapaayo pa gid suno kay Conlu kun may yara sang ikasarang ang pasyente sa pagkuha sang hospital room kag kun may magbaton man lang nga hospital sa COVID-19 positive nga iloy.
