CONCEPCION, ILOILO – Temporaryo nga gin-lockdown ang quarantine facility sa diin nahamtang ang tatlo ka mga nagpositibo sa Coronavirus Disease 2019 sa banwa sang Concepcion, Iloilo.
Sa interview sang Bombo Radyo kay Concepcion Mayor Dr. Raul Banias, iya ginpahayag nga duha ka mga Locally Stranded Individuals kag isa ka Overseas Filipino Worker ang nagpositibo sa banwa sa diin nagpauli ini sa Iloilo halin sa Metro Manila sang Hunyo 26.
Sa ila pag-abot, gin-diretso sila sa quarantine facility kag sang Hunyo 29 ginkuhaan sang swab sample.
Hulyo 9 sang nabaton ni Mayor Banias ang resulta sang ila RT-PCR test nga nagpositibo sa COVID-19.
Wala naman sang iban nga naka close contact ang tatlo ka mga COVID-19 positive kundi lunsay mga frontliners lamang nga naga monitor sa ila sa facility amo man sa nagadul-ong sang ila pagkaon.
Dugang pa sang natungdan, wala anay sang mahimo nga makasulod kag makaguwa sa quarantine facility samtang ang mga frontliners ang ipa-idalom naman sa nasal swab test.
