LEON, ILOILO – Gina-problema sang local government unit sang Leon ang paggutok sang ila quarantine facility.
Sa interview sang Bombo Radyo kay Mayor Ma. Lina Holipas, iya ginpahayag nga sa subong, 19 ang nagapaidalom sa mandatory facility quarantine kun sa diin 11 ang locally stranded individuals, 4 ang returning overseas Filipinos, kag 4 ang Authorized Persons Outside Residence.
Suno kay Holipas, nagatuga sang huol kun may yara sang mga LSIs nga nagapauli sa ila banwa apang wala sang koordinasyon nga ginahimo.
Halimbawa suno sa natungdan amo ang natabo sang Sabado, Hulyo 18, kun sa diin duha ka LSIs ang nalakip sa 198 nga nagbyahe halin sa Metro Manila pabalik sa Western Visayas.
Magluwas sa wala sang koordinasyon nga mga byahe, problema man suno sa alkalde ang madugay nga pag-release sang resulta sang reverse transcription polymerase chain reaction (RT-PCR) test.
Sa pihak sini nga mga problema, nagpasalig si Mayor Holipas nga magapadayon ang suporta sang local government unit sa naka-quarantine nga mga residente.
