ILOILO– Nagpasiguro ang Bureau of Animal Industry nga mas ginpabaskog nila ang ginapatigayon nga pag-quarantine agud makontrol kag malikawan ang pagsulod sang African Swine Fever sa Western Visayas.
Ini matapos nga ginkumpirma sang Department of Agriculture nga African Swine Fever ang nag igo sa mga napatay nga baboy sa Luzon.
Sa interview sang Bombo Radyo kay Dr. John Roel Hilario sang Regional Veterinary Quarantine Office VI sang Bureau of Animal Industry, iya ginpahayag nga may yara sang preventive kag mga quarantine measures nga ginapatigayon agud malikawan ang pagsulod sang nasambit nga virus.
Suno kay Hilario, padayon man ang ginapatigayon nga surveillance sa mga karneng baboy nga naga sulod sa Western Visayas nga posible naga dala sang virus.
Dugang sang natungdan, nakig-angot na ang Bureau of Animal Industry kag Department of Agriculture sa iban pa nga ahensya sang gobyerno kaangay sang Philippine National Police, Local Government Unit, Department of Transportation, Philippine Coastguard kag iban pa nga mahimo makabulig sa ila sa pag monitor sa mga karne nga naga sulod sa pungsod.
Nagpanugyan si Hilario sa mga hog owners nga nagakadapat nga maghalong kag siguraduhon nga gina sunod nila ang mga pagsulundan nga ginhatag sang Department of Agriculture kag siguraduhon man nga yara sa maayo nga kondisyon ang mga baboy agud malikawan nga ma apektuhan sang African Swine Fever.
Lakip sa mga sintomas sang African Swine Fever amo ang pagkadula sang gana sa pagkaon, pangluya sang lawas, hilanat, ubo, diarrhea kag paglain sang skin color sang baboy.
