ILOILO CITY – Madamo ang pasakaan sang kaso bangud sa paglapas sa ginapatuman nga quarantine protocol sa syudad sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga ang iban sa mga nagalapas sa quarantine protocol amo ang mga nagkaladakpan nga driver sang tricycle ukon trisikad apisar nga gindumili-an na ang pagbyahe.
May iban man suno kay Treñas nga nadakpan nga nagahampang sang sugal apisar sang lockdown apang sa pihak sini, ginpasiguro sang alkalde nga padayon ang monitoring sang COVID-19 team sa palibot sang syudad sang Iloilo.
May kaangtanan diri, ginpahayag naman ni Police Captain Shella Mae Sangrines, tagpamaba sang Iloilo City Police Office, nga naglab-ot na sa 1,452 ang total violators kun sa diin 147 ang pasakaan sang kaso bangud sa disobedience kag 5 naman ang na-inquest na.
Ginpahayag ni Sangrines nga lain naman nga kaso ang igapasaka sa mga nadakpan nga nagasugal sa distrito sang Molo.
