SINGAPORE – Amat-amat na nga ginpahalugan ang quarantine restrictions sa Singapore matapos nga nagnubo ang na record nga kaso sang Coronavirus Disease 2019 (COVID-19) sa tagsa ka adlaw.
Suno kay Bombo International Correspondent Mercy Cacan, kun sadto, linibo ka kumpirmado nga kaso ang na record sa tagsa ka adlaw apang as of July 4, naglab-ot na gid lamang sa 185 ang reported cases.
Ginpahayag ni Cacan nga kalabanan sa mga nagapositibo amo ang foreign workers apang gilayon sila nga ginpaidalom sa strict facility kag home quarantine.
Sa subong nga yara sa Phase 2 implementation sang Circuit Breaker sa Singapore, indi na mandatory ang pagsunod sa physical distancing ilabi na kun himata man lang ang kaupod sa pagsakay sa pampubliko nga salakyan kag pagkaon sa restaurant.
Kun yara sa bus ukon sa train, ginadumili-an lang ang pag-istorya sa kasubong nga pasahero agud nga malimitahan ang paglapta sang body fluids apang hugot nga ginapatuman ang pagsuksok sang face mask kag ang proper hygiene.
Sa subong, bukas ang tanan nga tourist destination apang local tourist lang ang mga nagabisita bangud sa kahangawa sa virus samtang balik-klase naman ang mga estudyante magluwas lang sa kolehiyo nga sa Agosto pa ang opening of classes.
Sa tagsa ka eskwelahan, may yara sang non-contact thermometer kag scanner para sa mas madasig kag mas husto nga pagkuha sang data sa tagsa ka estudyante.
Sa pinaka-ulihi nga data, naglab-ot sa 44,664 ang COVID-19 cases sa Singapore, 39,769 ang naka-reover samtang 26 ang patay.
