Ginpa-Bombo sang isa ka tag-iya sang duta ang ginapahayag indi husto nga pagpatigayon sang quarry ukon pagkuha sang mga balas kag bato sa ila lugar sa Brgy. Madong Janiuay, Iloilo.
Sa interview sang Bombo Radyo kay Renato Habana, iya ginpahayag nga Pebrero pa sang sini nga tuig nag-umpisa ang quarry sa iya nasakupan nga duta.
Suno kay Habana, sanday certain Jose Elmer Camarista kag Punong Brgy. Tikboy “Tiko” Camarista ang mga nagapatigayon sang quarry.
Ginapahayag nga nasaad sa pirmado nga permit sang mga natungdan sa pagpatigayon sang quarry, amo ang nagakadapat indi magsobra sa isa ka metros sang balas kag bato ang kutkuton kag kuhaon.
Pahayag ni Habana, wala man sila ginpahibalo nga may patigayunon nga quarry sa ila nga propedad.
Apang pahayag ni Habana, nagsobra na sa isa ka metros sang duta ang ginakutkot nanday Camarista.
Bangud man sini, ginbutangan niya sang kudal ang iya nasakupan nga duta pakadto sa iya nga balay agud indi na madalahig pa sa quarry.
Nagawangal man ang natungdan bangud Setyembre pa sang nagligad nga tuig siya nagapalab-ot sang reklamo sa opisina sang alkalde sang Janiuay, Iloilo, Municipal Environment and Natural Resources Office (MENRO), kag Provincial Government Environment and Natural Resources Office (PENRO), apang wala sa gihapon ginaaktuhan ang ginapahayag asud-asud nga paghimo sang bayolasyon nanday Camarista sa ila nga duta.
Samtang, gilayon naman nga nagsabat ang pamunuan sang Municipal Environment and Natural Resources Office natuhoy sa nasambit nga isyu sang quarrying.
Sa interview sang Bombo Radyo kay Joven Barranco, pinuno sang MENRO sa Janiuay, Iloilo, iya ginpahayag nga humalin pa sang Mayo sa sini nga tuig nila nabaton ang amo nga reklamo.
Makapila naman ka beses natsikyar sang MENRO ang lugar sa diin may quarrying nga ginhatagan man sang permiso sang Iloilo Province.
Gin-ako ni Habana, nga indi makasarang ang ila nga opisina sa pagtakos sang permitted area.
Bangud sini, kaupod ang PENRO kag Iloilo Provincial Government, ila pagatsikyaron ang lugar nga ginakutkot agud matul-id kun may bayolasyon sanday Camarista.
Sa tion nga mapamatud-an suno sa natungdan nga may bayolasyon, pat-od nga hatagan sang nagakaigo nga penalidad ang mga nagpatigayon sang quarry.
