ILOILO CITY- Nagapakatig-a sa gihapon ang pila ka mga quarry operators sa Tigum River sa Cabatuan nga mag-untat sang ila operasyon apisar nga nagapamalabag ang mga pumuluyo sa lugar.
Sa interview sang Bombo Radyo kay Armando Alfaro, residente sang Brgy. Bacan, Cabatuan, Iloilo, iya ginpahayag nga napalab-ot na nila ang ila reklamo sa
Department of Environment and Natural Resources, Mines and Geosciences Bureau kag Provincial Government Environment and Natural Resources Office.
Suno kay Alfaro, apisar napahibalo na nila sa mga quarry operators ang ila gin-file nga reklamo, padayon gihapon ang mga ini sa ila operasyon sa lugar.
Gintumod sini ang Cape Sand and Gravel kag Celoy Sand and Gravel nga nagrason pa nga sabton lang nila kun kasuhan sila kag mabayad lang sila kun multahan sila.
Nahibaluan nga may ginatukod nga dike sa amo nga suba apang sa atubang man mismo sang dike ginapatigayon ang quarrying.
