ILOILO CITY – Nagtaliwan na sa edad nga 96 ang reyna sang United Kingdom nga si Elizabeth II.
Ini ang gin-anunsiyo sang Buckingham Palace.
Si Elizabeth ang nangin reyna sang Britanya kag sang masobra sa isa ka dosena ka iban nga pungsod humalin sang 1952 lakip na ang Canada, Australia kag New Zealand kag nagmarka sang iya ika-70 nga tuig sa iya trono nga ginselebrar sang sulod sang apat ka adlaw sang Hunyo.
Sang Jubilee celebration, ginpahayag sang reyna nga inspirado siya sang kaayo, kalipay kag sang maayo nga relasyon sang iya pamilya nga makita man sa nagliligad nga mga inadlaw kag nagalaum ini nga ang paulupdanay nila ang mabatyagan pa sa mga maabot nga tuig.
Si Queen Elizabeth ang nagbulos sa trono matapos ang kamatayon sang iya nga amay nga si King George VI sang February 6, 1952 sang siya ang 25 anyos pa lamang.
Siya ang ginkoronahan sang Hunyo sang masunod nga tuig.
Nangin monarch siya sang tion nga napabilin sang Britanya ang iya empire.
Si Winston Churchill ang nangin una nga prime minister nga nagserbe sa tion sang iya reign.
Kasunod sang kamatayon ni Queen Elizabeth, magabulos na si Charles III bilang hari suno sa iya Clarence House.
Ang subang nga anak ni Charles nga si William ang nag-inherit sang Duke of Cornwall nga dugang sa iya current title nga si Duke of Cambridge.
Ginalauman nga maga-deliver sang pinakauna nga speech si King Charles III subong nga adlaw.
Sa iya naman nga official statement, ginpahayag sang bag-o nga hari nga ang kamatayon sang iya iloy ang makabig nga ‘moment of the greatest sadness’.
Nagpalab-ot naman sang pag-unong kag nagpahayag sang kasubo ang pila ka mga lideres sa bilog nga kalibutan.
Lakip na diri sanday UN Secretary-General Antonio Guterres, ang White House, ang mga lideres sang European Union, Ireland President Michael Higgins, India Prime Minister Narendra Modi, French President Emmanuel Macron, Italian Prime Minister Mario Draghi, Dutch Prime Minister Mark Rutte.
Suno naman kay UK Prime Minister Liz Truss, ang kamatayon sang reyna ang nagkibot gid sa bilog nga pungsod mangin sa bilog nga kalibutan.
Para sa iya, si Queen Elizabeth II ang makabig na nga haligi sang Britanya.
Nagbaskog pa ang Britanya sang siya ang nagpamuno sini.
Nahibaluan nga ang katapusan nga public appearance sang reyna amo ang pag-appoint niya sa ika-15 nga prime minister nga si Liz Truss sa Balmoral.
Kahapon, wala nadayon ang iya Privy Council meeting bangud sa rekomendasyon sang iya mga doktor nga magpahuway.
Samtang, halos indi naman makapati si Canada Prime Minister Justin Trudeau sa kamatayon sang reyna.
Suno sa iya, si Queen Elizabeth ang isa sa pinbakapaborito niya nga tawo sa bilog nga kalibutan.
Nagpalab-ot man sang pag-unong ang pinuno sang Simbahang Kalotika sa kamatayon sang Reyna.
Ginpalab-ot ni Pope Francis ang iya pagkasubo pinaagi sa telegram.
Naghatag man ini sang blessings kay King Charles III.
Nagapati man ang Santo Papa nga ubayan sang Diyos ang hari sa iya bag-o nga responsibilidad.
