ILOILO CITY – Nagpabutyag sang mensahe ang queen of all media nga si Kris Aquino para sa iya nagtaliwan nga utod nga si former president Benigno “Noynoy” Aquino III nga napatay sang nagligad nga tuig.
Ginpahayag ni Kris nga yara siya subong sa Estados Unidos kun sa diin, nagapabulong siya sa iya auto-immune condition.
Suno sa TV host-actress, kinahanglan niya nga mag-undergo sang corticosteroid challenge nga nagresulta sang indi tuman nga palanakit sang lawas kag ginpatulog siya humalin sang Mayo 7 tubtob sang Mayo 11 bangud sang palanakit sang lawas nga indi niya maagwantahan.
Sang Hunyo 5 lamang ini nakabaton sang first dose sang iya bulong.
Suno sa aktres, naintindihan niya kun ngaa nga gintago ni Noynoy ang iya masakit.
Nagpasalamat man ini sa mga nagpangamuyo para sa iya madali nga pag-ayo.
Nagapadayon sa gihapon ang pagpakigbato ni Kris sa iya nga “multiple autoimmune syndrome” apisar nga naga-function sa gihapon ang iya nga kidney kag liver kag wala man sang cancer genes.
Ginkumpirma man sang aktres nga nagpositibo ini sa COVID-19 sa US upod sa iya duha ka anak nga sanday Joshua kag Bimby.
Masakit para sa iya nga bayaan si Joshua bangud daw kaangay nga ginpabay-an niya ini sa tion sang iya kinahanglanon.
Apisar sini, ginpasalig ni Kris nga malampuwasan nila ang COVID-19 bangud nga indi gusto ni Noynoy nga mapatay man sila.
Sa pihak sang gina-agyan ni Kris, gusto niya ang privacy nga may yara ang iya nga magulang sang siya ang nagamasakit pa.
Nagalaum man si Kris nga makakit-anay sila liwat sang iya mga followers.
