ILOILO CITY- Ginpasiguro sang Queen City Development Bank ang pagpabakod pa sang mga regulasyon, pagdumala kag pamaagi agud mapaayo pa ang financial stability kag serbisyo sa mga kliyente.
Ini kadungan sang pag-umpisa sang Top Level Management Conference sang Queen City Development Bank subong nga adlaw bilang kabahin sang pagselebrar sang ika-38 sini nga tuig.
Ginahiwat ang aktibidad sa Dr. Rogelio M. Florete Leadership Center, Queenbank Building, Valeria St., Iloilo City kag ini ang magalawig tubtob sa Pebrero 8, Sabado.
Ang Top Level Management Conference ang ginpangunahan ni Queenbank’s Chairman Emeritus Dr. Rogelio Florete, QueenBank President Ms. Margaret Ruth Florete, Senior Vice President Mr. Enrico Jacomille, kag First Vice President Mr. Dante Javellana.
Ang tema subong nga tuig amo ang: “Taking Ownership Through Excellence.”
Sang tuig 2019, ginpauswag pa sang Queenbank ang deposit liability sini, isa ka produkto nga nagapamatuod sang pagsalig sang publiko sa serbisyo sang bangko nga may yara sang wala nahigkuan nga imahe, may mabaskog nga capital position kag portfolio-base.
Naglab-ot sa P175 million ang gross revenue kag may total nga P2.4 billion nga resources ang Queenbank.
Dugang pa, naglab-ot sa P1. 625 billion ang deposits kag yara naman sa P1.734 billion ang loan portfolio.
Ang Queenbank ang miyembro sang Philippine Deposit Insurance Corporation, Banknet, kag sang Florete Group of Companies.
