Ginmanduan sang korte ang ginaakusaran nga sex offender nga si Apollo Quiboloy nga ipaathag ang iya pre-recorded video nga gin-ere bisan nga wala sang court approval.
Ginpakita ini nga video sa prayer rally sang mga miyembro sang Kingdom of Jesus Christ (KOJC) sang Pebrero 9 kag gin-post sa Facebook page sang SMNI News Channel pagkasunod nga adlaw.
Naghatag si Judge Rainelda Estacio-Montesa sang Pasig Regional Trial Court Branch 159 kay Quiboloy kag iya abogado nga si Atty. Israelito Torreon sang lima ka adlaw agud nga mapaathag ang pagpaguwa sang video.
Gin-alegar nga ginlapas sang pastor ang guidelines and parameters nga ginbalay sang korte.
Nahibaluan nga nagapadalagan si Quiboloy sa pagkasenador sa May 2025 midterm elections, apang preso ini subong sa Pasig City Jail bangud sa kaso nga human trafficking nga wala sang pyansa sa idalom sang Section 4(a) sang Republic Act No. 9208, as amended.
May kaso man ini sa idalom sang Section 5(b) kag Section 10(a) sang Republic Act 7610 ukon ang Special Protection of Children Against Abuse, Exploitation, and Discrimination Act.
