Wala ginakonsiderar sang kapulisan nga “armed and dangerous” si Kingdom of Jesus Christ (KJC) founder Pastor Apollo Quiboloy bangud wala man ini sang rekord nga may ginapanag-iyahan ukon nangin myembro sang private armed groups.
Suno kay Philippine National Police (PNP) spokesperson Col. Jean Fajardo, wala man sang indikasyon nga nagapanag-iya si Quiboloy sang armas.
Apisar sini, magapadayon ang pag-ayam sang kapulisan kasunod sang arrest warrants nga ginpaguwa sang korte sa Davao.
Gindugang man sini nga indi lamang limitado sa Davao City ang lokasyon nga libuton sang tracker teams nga gintukod sang Davao police kag Criminal Investigation and Detection Group.
Wala man sang may nabaton ang reports ang kapulisan nga nagbiya si Quiboloy sa pungsod.
Sa arrest orders sang Davao Regional Trial Court, nakasaad nga si Quiboloy kag ang iya subordinates ang ginkasuhan sa paglapas sa Republic Act 7610 ukon ang Anti-Child Abuse Law partikular na sa probisyon sa sexual abuse sang minors kag maltreatment.
Ginserbe sang NBI kag Criminal Investigation and Detection Group operatives ang arrest warrants kay Quiboloy kag lima ka iban pa sa Barangay Tamayong sa Davao City apang wala didto ang pastor.
Sang Myerkules, tatlo sa mga akusado nga sanday Cresente Canada, Paulene Canada, kag Sylvia Camanes ang nagsungka sa otoridad kag nakapyansa na sang tag-P80,000.
Sang Huwebes, duha ka iban pa nga amo sanday Jackiely Roy kag Ingrid Canada ang nagsungka man nga ginaproseso man ang pyansa.#
