Gin-report sang Philippine National Police (PNP) sa Davao City nga nagdangat na sa 200 ka mga babaye ang naabuso ni Kingdom of Jesus Christ (KOJC) founder Apollo Quiboloy sa sulod na sang malawig nga mga tinuig.
Ginpresentar ini ni Davao City Police Office chief Police Colonel Hansel Marantan sa hearing sang Senate Committee on Women kun sa diin yara man mismo si Quiboloy kag ang pila sa ginaalegar biktima sini.
Suno kay Marantan, ila na na-identify ang 68 sa sini nga mga babaye nga lain-lain ang edad apang pareho nga naka-eksperyensya sang sexual exploitation sa kamot sang pastor.
Base sa istorya sang mga pastoral suno kay Marantan nga ginbase man sa ginatudlo ni Quiboloy sa inner pastorals, gusto niya makatipon sang 1,000 ka mga babaye para mailog ang istorya sa bibliya partikular ang iya ni Hari Solomon nga may 700 ka mga asawa kag 300 ka concubines.
Ginaalegar nga ginapaidalom man ang mga inner pastorals sa ginatawag nga “strict fellowship” para nga ma-“brainwash” sila sa katuyuan sang amo nga iligal nga aktibidad.
Sa amo man nga hearing, ginpresentar nanday Marantan kag anay Davao Region director kag subong Criminal Investigation and Detection Group (CIDG) Director Police Brigadier General Nicolas Torre III ang kuwarto ni Quiboloy sa Bible School kun sa diin ginaalegar nagakatabo ang sekswal nga mga pagpang-abuso.
Todo panginwala naman ang pastor sa alegasyon nga may sexual abuse nga nagakatabo kag ginhangkat sini ang mga nagatum-ok sa iya nga magpasaka na lang sang kaso sa korte agud maatubang niya sang patas.
Naka-detain si Quiboloy sa PNP Custodial Center sa Camp Crame bangud sa ginapangatubang sini nga non-bailable qualified human trafficking charge kag may kaso man nga child abuse.#
