ILOILO CITY – Nagpaandam ang pila ka senador sa mangin implikasyon sang quo warranto petition nga ginpasaka ni Solicitor General Jose Calida sa Korte Suprema agud mapahalin sa puwesto si Chief Justice Ma. Lourdes Sereno.
Ginpahayag ni Sen. Francis Pangilinan sa interview sang Bombo Radyo Iloilo, tuman ka peligroso kun pahanugutan ini sang Korte Suprema.
Magahatag ini sang impresyon suno kay Pangilinan nga sin-o man nga mataas nga opisyal, apisar ang presidente sang Pilipinas, ang mahimo pahalinon sa puwesto paagi sa amo nga petisyon kag indi na kinahanglan ang impeachment.
Suno sa senador, dapat nga desisyunan gilayon sang mataas nga hukmanan ang nasambit nga isyu.
Apang nagpaandam si Pangilinan nga kun ang mga justices man ang magadesisyon, labi nga maguba ang imahe sang Supreme Court.
Mangin bias ang Korte Suprema sa panan-awan sang publiko kag madula ang pagsalig sa mga mahistrado bangud nahibaluan na sang mga tawo nga wala naga-intyindihanay ang mga mahistrado sang Supreme Court.
Ginpanindugan ni Pangilinan nga ang paagi lang agud mapahalin ang mga impeachable officials ang paagi sa impeachment gani dapat respetuhon ang Konstitusyon.