ILOILO CITY – Nagapati ang oposisyon nga kahimuan sang Malacañang ang pagpasaka sang quo warranto petition sa Korte Suprema agud sipaon sa puwesto si Chief Justice Ma. Lourdes Sereno.
Ginpahayag ni Sen. Francis Pangilinan sa interview sang Bombo Radyo Iloilo nga apisar wala ini sang ihibalo kun may Plan A ukon Plan B ang gobyerno, apang abogado sang gobyerno si Solicitor General Jose Calida nga amo ang nagpasaka sang petisyon.
Kun Malacañang man ang sa likod sini, ginpahayag ni Pangilinan nga nakompromiso na ang independence sang mga institusyon sang gobyerno.
Suno kay Pangilinan, talakayon pa sa Senado ang isyu sang quo warranto apang karon pa lang nagakabalaka na ang senador nga labugayon sini sang impeachment proceedings.
Nagpaandam man ang senador nga labi maguba ang imahe sang mataas nga korte bangud sa quo warranto petition.