Isa sa mga rason sa pag-overload sang mga pasahero sa mga modernized jeepney amo ang quota sa mga kundoktor.
Sa interview sang Bombo Radyo kay Raymundo Boyet Parcon, Chairman sang Western Visayas Transport Cooperative, iya ginpahayag nga kun maglapaw ang mga kundoktor sa ila nga mga quota, may ara sila sang makuha nga porsyento.
Apang suno man sa iya, may ara gid sang mga salawayon nga kundoktor kun sa diin bisan pa nga tuman na kagutok sa sulod sang pampubliko nga salakyan, padayun sagihapon sang mga ini nga ginapasulod ang iban nga mga pasahero.
Pahayag man niya, makapila naman ka beses nga nakabaton ang ila opisina sang reklamo nahanungod sa overloading sang ila nga mga unit.
Suno man sa iya nga naga-ubra naman sila sang mga tikang agud nga gilayon nga madakpan ang mga salawayun nga mga kundoktor kag masuspende ang mga ini sa ila nga mga ginapang-obra.
Nagapati man siya nga dapat komportable ang mga pasahero sa ila nga ginasakyan kag indi dapat magtuga sang problema sa mga ini.
Dugang pa niya, wala nila ginatolerar ang overloading kag nagpahayag man nga pabor sya sa programa kun sa diin dakpon ang mga pasaway nga mga kundoktor kag hatagan sang penalidad.
