ILOILO CITY – Tuman ang kalipay sang isa sa mga tawo nga nagbulig agud mangin madinalag-on si Rabiya Mateo kag ginkoronahan bilang Miss Universe 2020.
Sa interview sang Bombo Radyo kay Mr. Joe Marie Agriam, publisher sang Cream dela Creme Magazine kag former Regional sang Philippine Chamber of Commerce and Industry (PCCI) Western Visayas, iya ginpahayag nga sang nakabaton sila sang impormasyon nga patigayunon ang Miss Iloilo 2020, gilayon niya nga ginpadal-an sang mensahe si Rabiya.
Nagapati si Agriam nga makuha ni Rabiya ang korona bangud perfect package na siya sa diin matahom ini kag maalam.
“Pagkita ko na before sa iya, nangaluyag gid ako nga maintra siya sa Miss Iloilo. I gave her all the support para nga siling magdaog. Kag asta sa Manila, ginsuportahan ta. Wala ta gid ya ginlipatan. Tanan-tanan nga kinahanglan ya ginsuportahan ta until nga nadaog ya kag nakuha ya gid ang korona,” pahayag ni Agriam.
Suno kay Agriam, nagduha-duha pa sa una si Rabiya nga magbalik sa Iloilo City bangud may trabaho pa ini sa Metro Manila bilang isa ka lecturer sa review center.
Nagresign naman si Rabiya sa iya trabaho agud magpauli sa Iloilo.
Apang sa ulihi, nagpasugot man si Rabiya sa pasalig ni Agriam nga buligan siya sang mga negosyante nga Ilonggo sa tanan niya nga mga kinahanglanon sa pageant.
Sang Enero 2020, kadungan sang Dinagyang Festival 2020, ginkoronahan si Rabiya bilang Miss Iloilo Universe 2020.
Ini ang pinakauna nga pageant nga ginpasakupan ni Rabiya.
Sang yara na sa Manila, madamo sang mga nagtanyag sang bulig sa Ilongga beauty humalin sa kwarta, pagkaon, gown, sapatos, kag salakyan.
Sa subong suno kay Agriam, indi sa gihapon matupungan ang kalipay nga iya nabatyagan.
