Gintapungol sang isa ka Filipino health worker ang isa ka racist woman sa sulod sang N Broadway Express train sa New York City.
Suno ini kay Philippine Consul General in New York Elmer Cato.
Sa tweet ni Cato, ginpahayag nga nagdupla ang babayi sa iya nga kamot kag ginpahid ini sa Filipino hospital worker nga kaingod sini sa train.
“She then saw a few stars,” paglaragway ni Cato sa sunod nga natabo. Suno sa Philippine consul general, ang nasambit nga Filipino nga naghalin sa pamilya sang boxing legends sa Pilipinas.
Wala na sang dugang nga detalye nga ginhatag agud nga proteheran man ang nasambit nga Filipino health worker.
Ginapahayag nga sa amo nga lugar, may at least 40 ka mga kaso sang anti-Asian hate crimes lakip na sa Filipinos halin sang 2021.
Lakip diri ang brutal nga pagpang-atake sa 67-anyos nga Pinay sa sulod sang iya nga apartment sa Yonkers City, New York State sang March 11.
Taga-Ilocos region ang biktima. Nag-suprer ini sang injuries sa ulo kag nawong. ##
