Nagpasalig ang Regional Anti-Cybercrime Unit (RACU) VI nga handa ang ila talatapan nga magbulig pananglitan may mga mag-reklamo nga mabiktima sang mga deepfake ukon digitally created nga videos ilabi na subong nga nagahilapit ang 2025 midterm elections.
Sa interview sang Bombo Radyo kay Police Lt. Darius Linsasagin, chief sang Digital Forensic Section sang RACU VI, iya ginpahayag nga nagapadayon man ang ila headquarters sa pag-procure sang kinahanglanon nila nga mga equipment agud ma-detect ini nga mga pagpameke.
Sa subong suno sa iya, wala pa sang mga pulitiko sa Western Visayas nga nakapalapit sa ila nga opisina kag nagpasa sang complaint nga kaangot sini ukon may nalapas sa Republic Act 9995 ukon Anti-Photo and Video Voyeurism Act of 2009.
Ang kalabanan sini nga mga kaso suno sa natungdan ang nagakatabo sa mga babaye kun sa diin ginagamit ang lawas, ginalain ang itsura, kag ginapalapta online. Ginplastar man sini nga masami ini nagakatabo sa social messaging app kag sa social media.
Sang damlag lang, antes mismo ang State of the Nation Address (SONA) ni President Ferdinand Marcos, Jr., isa ka video ang ginpakita sa Maisug rally sa Los Angeles, California kun sa diin halos kanawong ni Marcos ang tawo nga nagagamit sang iligal nga droga.
Madasig ini nga gin-address sang otoridad kag gintawag nga “deepfake” nga gina-alegar parte sang attempt nga gub-on ang Marcos administration.
