Patay ang isa ka 63-anyos nga radio broadcaster sa Mindanao sang ginluthang sang wala pa makilal-an nga suspek matapos mismo ang iya programa sa isa ka local station.
Ang biktima amo si Erwin Labitad Segovia ukon mas kilala nga si “Boy Pana” nga kilala sa programa nga nagadala sang socio-political topics kag mga isyu nga naangot sa lokal nga panggobyerno.
Sandig sa inisyal nga reports, pauli na kuntani si Segovia sang ginsundan ini sang duha ka mga suspek nga sakay sa isa ka motorsiklo. Sang nakalab-ot na sa John Bosco Street, Barangay Mangagoy, Bislig City, Surigao del Sur, didto kag gintiro ang biktima.
Suno kay Undersecretary Jose Torres Jr., executive director sang Presidential Task Force on Media Security (PTFOMS), na-activate na ang Special Investigation Task Group on New Cases agud nga ma-imbestigaran ang krimen.
Nagapakig-angot man ang opisina sa Philippine National Police Media Vanguards kag sa Media-Citizen Council sa Region 13 ukon Caraga Administrative Region agud nga mapadasig kag mapadalman ang imbestigasyon.
“The safety of journalists remains a priority for the government, and justice for victims of media-related violence continues to be a national concern,” suno kay Torres.
Sa press statement sang PTFOMS, ginpanawagan man sa publiko kag sa media community nga mag-aligmat kag maghatag sang impormasyon para makabulig sa pagpangusisa sang awtoridad.#
