ILOILO CITY – Magapangatubang sang dako nga penalidad ang Philippine Basketball Association star nga si Beau Belga matapos ang ginpatigayon nga imbestigasyon sang Rain or Shine kasunod sang paghampang sini sa Cebu nga nagresulta sa inaway.
Sa resulta sang imbestigasyon, ang veteran big man ang naghampang man sa pila pa ka unsanctioned exhibition games kaangay sang ‘Ligang Labas’ games sa Davao kag Laguna magluwas pa sa natabo sa Cebu.
Ang 36 anyos nga si Belga ang magabayad sang multa nga 15 ka adlaw nga balor sang iya sweldo.
Kun balik-balikan, si Belga ang nakit-an nga nagahampang sa isa ka unsanctioned basketball game sa Cebu nga nagresulta sa kinagamo upod sa iya anay teammate nga si JR Quiñahan kag iban pa nga mga players.
Magluwas sa multa, si Belga ang gindagdagan man sang six-day suspension with no pay sang management sang Elasto Painters.
