Gindeklarar sang state weather bureau ang opisyal nga pagsugod sang tag-ulan ukon rainy season sa Pilipinas.
Ginhimo sang Philippine Atmospheric, Geophysical, and Astronomical Services Administration (PAGASA) ang anunsyo tatlo ka adlaw matapos ang statement nga nagasaad nga nagaapekto na ang southwest monsoon ukon ang habagat sa pungsod.
Matumod sang ahensya ang pag-umpisa sang rainy season paagi sa data nagikan sa 13 sini ka mga estasyon sa western portions sang Luzon kag Visayas.
Ginpahayag sini nga na-monitor nila ang lapta-lapta tubtub lapnagon nga pag-ulan sa nagligad nga lima ka adlaw dala na sang Habagat.
“Scattered to widespread rainfall has been observed in the past five days due to the Southwest Monsoon (Habagat). This signifies the onset of the rainy season across the western sections of Luzon and Visayas,” suno sa PAGASA. “However, there may still be breaks in the rainfall that extend over a few days or weeks, referred to as monsoon breaks.”
Kinaandan nga nagasugod ang tag-ulan sa Pilipinas sa ikaduha nga semana sang Mayo kag nagalawig tubtub sa Nobyembre.
Halin sa Hunyo tubtub sa Nobyembre, ginabanta sang weather bureau nga 11 tubtub 19 ka tropical cyclones ang magaporma ukon magasulod sa Philippine Area of Responsibility (PAR).
Sa rekord sang PAGASA, wala pa sang tropical cyclones diri sa Pilipinas halin sa pag-umpisa sang 2025.
Ginapahanumdom ang publiko kag ang concerned agencies nga maghalong gid sa epekto sang ulan, habagat, kag iban pa nga climate and weather events.
